CLICK HERE FOR BLOGGER TEMPLATES AND MYSPACE LAYOUTS »

2008-10-10

أخيرا ... تاجااااااات


أيوة أنا .. مش عايز ضحك
.....
هل أنتم مستعدين لقراءة اجابات علي 11 تاج .. بالتأكيد لا .. أعترفوا بالحقيقة ولن أغضب فلو كنت أنا مكانكم لما قرأت حتي العنوان
لكن في الحقيقة بعضهم مكرر ولذلك هم 3 فقط .. سأقوم بضمهم جميعا في تاج واحد مع بعض الأختصار
في البداية أشكر كل من أرسل إلي تاج وأعتذر لهم عن التأخير وهم
- angel love - شهرزاد - free killer - نونو - الفارس الملثم- ورود وأشواك - حبيبة - سارة علي - عاشقة الحب - شهد الكلمات - قلب مصري
أعتذر إن كنت نسيت أي شخص أخر
هيا نبدأ سريعا
....
لو اعطيتك 3 وردات من هم ال3 اشخاص الي هتديهم الورده؟
وردة لأسرتي .. وردة لمن أحب .. والوردة الثالثة مش عارف لمين .. ممكن ارجعها للمحل واخد تمنها
ماهو هدفك في الحياه؟
أن أكون دوما سببا في أفراح الغير ولا أسبب حزن لأي شخص
اجمل مقوله سمعتها في حياتك ايه؟
كتير .. وأعشق دوما الأقوال المأثورة في هيئة الشعر ومنها أبيات للإمام الشافعي يقول فيها
يخاطبني السفيه بكل قبحٍ
فأكره أن أكون له مجيبا
يزيد سفاهةً فأزيد حلماً
كعودٍ زاده الإحراق طيبا
من المغني الي بتحبه اوي واحلي اغنيه ليه ايه؟
أم كلثوم .. أعشق كل أغانيها
وأي كلمات وألحان رائعة أحبها بغض النظر عن أسم المطرب
عمرك غشيت في امتحان وانت صغير؟
يوووووووو .. وأنا كبير كمان ههههههههه .. هو طبعا مش غش بالمفهوم أياه لأن دراسة الطب بتحتاج مذاكرة ولا يجدي معها أي غش .. لكن لو خدت اجابة سؤال اختيارات أو صح وغلط من اللي جنبي فبتحصل ساعات عشان مابقاش كداب
لكن أنا قررت أني مش هاعمل كده تاني .. مش عشان حاجه بس عشان خلصت امتحانات
لو مرتبك كان كتير يكفي تجيب اغلي هديه تجيب لكل فرد في عيلتك ايه؟
هاحاول أعرف كل واحد عايز ايه من غير ما ياخدوا بالهم في الخباثة يعني في وسط الكلام
بكلمه واحده ايه الصفه الي عاوزها في شريكة حياتك؟
الرومانسية
ايه المجال الي غير دراستك وشايفه نفسك فيه اوي حتي لو كان الرسم علي الحيطه؟
مش لدرجة الرسم علي الحيطة عشان ما نزعلش نانسي عجرم مننا برده
لكن حاجات كتير كلها متعلقة بالفن أهمها بالترتيب الموسيقي والشعر والرسم .. وكان ليا مجموعة أصدقاء في ثانوي كل واحد مننا بيعزف الة موسيقية كان حلمنا نكون فرقة موسيقية ونعمل الحان لينا بس ضاع وسط الاحلام اللي ضاعت
التاج الأول خلص (حسيتوا بحاجه ؟) .. نخش ع التاني
.....
بدأت تدون من امتي ؟ و دخلت العالم ده ازاي ؟
البداية الحقيقية منذ 5 أشهر .. لكن منذ سنة تقريبا سمعت عن التدوين من بعض الأصدقاء في الكلية وصممت لنفسي مدونة بالفعل كانت علي مكتوب ولكن لم استطع المواصلة لظروف الدراسة
ايه أهم حاجة اتعلمتها من عالم التدوين ؟
أني أقدر أعبر عن اللي جوايا وبالتأكيد هناك تحسن من حيث الأسلوب والأداء وده بفضل متابعتكم وأراءكم
ايه أكتر حاجة كرهتها ؟
كتييييييييييير ومنها
المجاملة
التعليق علي موضوع بدون قراءته من أجل رد الزيارة فقط
النقد الجارح
المبالغة في المدح علي بعض المواضيع التي اقرأها علي مدونات اخري وربما أراها عادية .. ولكني أري التعليقات من نوعية .. تحفة ..يجنن .. فزيع (بالزين) .. وربما بعض الفتيات تصاب بالاغماء .. وهذا يجعل التعليقات في بعض الأحيان تفقد مصداقيتها
حاسس ان التدوين له تأثير ؟
أكيد حتي لو مفيش تأثير علي من يقرأ كفاية تاثيره علي نفسي وان بقي عندي فرصة لافراغ شحنة بداخلي
....
وأخيرا .. أكتب 16 صفة عن نفسك ؟ سأذكر قدر ما أستطيع
ـ أعشق الضحك جدا في حين يراني البعض أميل للجدية
ـ رومانسي وهذا لا يكتشفه الا المقربين مني فقط
ـ مغامر وأعشق روح المغامرة .. وأكره التردد والضعف .. وأكون دوما علي استعداد لتحمل خطأ أي قرار أتخذه
ـ غيور جدا علي أي شيئ أحبه أو أمتلكه
ـ أحب دوما التفوق أو التميز وربما هذا يزداد عن الحد في بعض الأحيان فأرفض مبدأ الهزيمة أو بمعني أخر تنقصني الروح الرياضية لتقبلها
ـ الكبرياء والكرامة أشياء مقدسة لدي و لا يمكن المساس بها
ـ لست كثير العصبية لكن ربما وقت أن أصل لهذة المرحلة تصدر عني بعض الحماقات
ـ أعشق الفن بكل صورة و أحب الهدوء و التأمل
ـ لدي قدرة كبيرة علي اقناع من أمامي بوجهة نظري .. لكن أحيانا تزيد عن الحد فتصل للسفسطة
ـ لا أتأقلم مع من حولي من البشر بسهولة .. ربما يراه البعض غرورا مني ولكن أنا من النوع الذي حين يخاطبني شخص جواري بوسيلة المواصلات فأبتسم له دون رد ثم أدير وجهي تجاة النافذة حتي يحين موعد نزولي
بس خلاص .. علي رأي شعبولا
.....
أعتقد أن انا أخر واحد في عالم المدونات يجاوب علي التاجات دي عشان كده مش لاقي حد اهديله تاج .. بس اللي نفسه يجاوب اي حاجه يتفضل

33 التعليقات:

EMMY BABY يقول...

احم احم اول تعليق

شكلى كدة اتنسيت ههههههههههه

ماعلينا

بجد عجبتنى اوى حتة انك نويت تبطل غش دى علشان خلصت ههههههههههه

حاجة تانيةغريبة انك قلت ان المقربين منك بس اللى يعرفوا انك رومانسى

بالرغم ان الرومانسية وواضحة جدا فى شخصيتك والدليل على كدة اشعارك التحفة الجميلة الفزيعة بالزين

فى فعلا ناس مهما اصلا قلنا كلام حلو عنهم مش هيكفيهم بجد والله

انا عن نفسى شايفة اشعارك من نوع فريد جدا

اجابات فى الجون ولا حسيت والله انهم 3 تيجان

ربنا يوفقك

تحياتى

ايمى

غروب يقول...

هااااهاههههههها

اول تعليق

الاجابات بجد حلوه اوووى

ضحكت اوى على حكايه انك ترجع الورده دى ؟

انت بخيل ولا ايه؟

جميل اوى البوست قربنا من شخصيتك

يلا سلام

غير معرف يقول...

أول مرة أدخل مدونتك، وعجبني أوي جمعك بين الطب والشعر والرسم... ياريت تحافظ على مواهبك في الشعر والرسم خاصة وإننا في عصر بيقتل أي مواهب

نـــــور يقول...

هاااااااااااااااى ازيك يافارس
طبعا مستغرب لانى اول مره اقول هاى :)

بس عاتى عاتى
انت لسه فاكر تجاوب ياعم يانهار ابيض
ده بلوجر دلوقت بيبعت ناس تلم التاجات دى علشان ينزل تاجات جديده لانى دى قدمت خلاص ههههههههههههههه

بس تصدق كنت عثل وانت صغير ؟ امال لما كبرت الحلاوة دى راحت فين ؟؟؟!!!!!-وش بيطلع لسانه- هههههههههه

تعرف كنت حاسه بالصفات دى مش عارفه ليه والله ماعدا بتاعت المواصلات بطلوا قلة ذوق بقى ههههههههههه

زمانك مفروس منى كفايه عليك كده النهارده
يلا بااااااااااااااى
والى تاج جديد ان شاء الله :))

الفارس الملثم يقول...

ايه يا عم الكروته دي كلها بقوا دول 11 تاج ممممممممممممم

طبعا يا فارس اجابتك جميله اوي وانت بجد شخصيه محترمه جدا وقلم رائع ومبدع من غير مجامله علي طريقة وربما بعض الفتيات تصاب بالاغماء هههههههههه وعلي فكره فعلا بعض التعليقات بتحمل مبالغات تشل علي حاجات اقل من عاديه كمان

تحياتي وتقديري دائما

Radwa يقول...


فارس
اول تعليق
هما دول التاجات الكتييييييييييير
بس بجد اجابات كويسه جدا وان نمت على شئ انما تنم على حسن شخصية صاحبها
اهم حاجه عجبتنى موضوع الكبرياء لانى مش بلاقيه كتير الأيام دى
....................
سندريلا

yoyo يقول...

وبعدين بقى فى موضوع الاشراف على التعليقات دا يعنى الواحد كدا مش عارف هو التعليق الكام يالا اهوا يعمل نفسه مش عارف حاجة ويعيش فرحة التعليق الاول ههههههههههههه

حلو اوى كولكشن التاجات دا والله لاول مرة بشوف تاجات بالجملة كدا عندك

اه يعنى وردة لاسرتك تمام كدا والوردة التانية لمن تحب اممممممممم ماشى اجابة مفتوحة كدا وهنعديها يا بنى ربنا امر بالستر هههههههههههه
يا نهار على الناس المادية حد يرجع الوردة وياخد ثمنها اقولك تجيب وانا اغيرها لك وهعمل لك تخفيض برده انت تبعنا يعنى ههههههههههههههه

ربنا يوفقك وتحقق كل احلامك واهدافك فى الحياة

كما عرفتك انسان صاحب مشاعر وذواق للفن الجميل

ربنا يكون فى عونك انتوا من الناس اللى بتكفاح والله عندة احمد قرب يختفى والله المذاكرة عندكم كتير جدا ربنا يكون فى عونكم والله بس هو انتوا اصلا هتغشوا ايه اللى حاجات بسيطة وان نفعت يعنى بس يالا بقى مش شافهم وهما بيغشوا شافهم وهما بيعترفوا هههههههههههههه

اتفق معاك فى بعض النقاط الخاصة بعالم التدوين بجد بتكون حاجة تنرفز لما تلاقى حد داخل بيتكلم فى حاجة ولا كانه بيعمل اعلان وانت مش عارف مين ابن مين فى الموضوع واو داخل يسجل مرور وخلاص زى اللى بياخد الغياب

صفاتك جميلة بالفعل بس رومانسى دا جايز بسبب المهنة و حكم التعاملات الرسمية الناس بتشوفك جد اكتر

حلو اوى روح المغامرة والتحدى اللى موجوده جواك ربنا يسعدك يارب ويسعد قلبك وتحقق كل احلامك

وعقبال التاجات القادمة بس مش تبقى تتاخر كدا فى عمل الواجب ههههههه

تحياتى واحترامى للفارس النبيل

دمت بالف خير
تحياتى
يويو

فلسطينية الهوى يقول...

دي اول زيارة للمدونة

حلوة اجاباتك

أكتر حاجة عجبتني إعجابك بالفن

ربنا يوفقك

كـــيــــــــارا يقول...

اجابات جميله جدا
--------
التعليق علي موضوع بدون قراءته من أجل رد الزيارة فقط
النقد الجارح

-------

اتفق معك فيه
-------
عتقد أن انا أخر واحد في عالم المدونات يجاوب علي التاجات دي
-------

عندي 9 تاجات لما احلهم لازم طبعا مش انساك (وش بيغمز)

Maha Shahen يقول...

ايه دا انت عامل مراقبه للتعليقات ولا انا اول تعليق
دنا في حياتى ما عملتها

المهم نقول رأينا بغض النظر عن الترقيم

بسم الله الرحمن الرحيم
لو حضرتك كنت كتبت 25 صفحه مش 3 تاجات بس او اختصار 11 تاج كما ذكرت اللي بيحبوا يقروا ليك بجد او يهمهم مين أحمد هيقروا دون كلل او ملل

ومنغير ما تتريق علي الناس اللي بتكتب تعليقات بتاعت فظيع مريع شنيع دى هههههههههههه
ممكن بجد يكون عاجبهم بس مش عارفين يعلقوا بكلمات منظومه فبيقولوا هايل للصبح
ولو هما بينافقوا فأكيد بينافقوا نفسهم وبس فلا تزعجك تلك التعليقات

ونسيت اقولك اول ما شوفت الصوره قولت بتاعتك لكن اول ما قريت انك كاتب عليها صورتى معرفش ليه ضحكت
برغم انها صوره والله زي القمر ومش بعاكس بس كنت طفل امور وخد بالك من كنت دى ههههههههههههههههه
منا معرفش مازلت ولا لا بس شكلك كنت قصير وانت صغير لدرجه هايله فعلا

بتمنالك التوفيق وكان فى بالى كلام كتير بس صعب افتكره كله الزهيمر بقى معلش

خالص تحياتى وتقديرى

غير معرف يقول...

ايه السكر دا
تحفة الصورة من غير كلام طبعا

والله من خلال ردك على التاجات دى اقدر اقول انك انسان رائع .. مرح جدا وعندك درجة من العقل والرزانة ..ودا ميمنعش الرومانسية اللى بتنقط من الكلام

سلام

princess يقول...

هاى
اولا حكاية حسيتوا بحاجة فكرتنى بالحقن مش عارفة ليه:) بردو المهنة بتاثر:)
ثانيا بطلت تغش عشان الامتحانات خلصت؟؟ ههههه طب ما دى طبيعى بس التوبة خدت معاك وقت شوية
اما الحاجة اللى استغربتها حكاية التعليقات اللى مبالغ فيها دى بتختلف من شخص لاخر
يعنى مثلا ممكن تقرا يا دكتور موضوع ميعجبكش لكن فى ناس تانية يمس حتجة عندها او تشوفه حاجة حلوة
منقدرش نعمم ونقول دى ناس بتبالغ:)
بس كده
مبروك على كل التيجان(جمع تاج)
تحياتى

شهد الكلمات يقول...

بدايتا كدة احنا مافيناش من حمرقة انت واخد التاج السهل و سايب الصعب لا مافيناش من الحركات دي
التاج التاني هاتجوبه هاتجوبه
ممكن اديك فرصة و تجاوبة بعدين لكن مش هاتنازل عن الاجابة ;d

نيجي بقي للبوست

اولا الصورة كتكوتة و زي العسل و نظرتك فيها حسستني انك بتقول للي بيصور اخلص بقي و شكلك كنت معيط ساعتها ولا اية ههههههههه
بس عارف انا بصيت للصورة و لصورة الفارس اللي انت حطه اللوجو بتاع المدونة و حسيت انه انت و انت صغير و و انت كبير بس كان شعور مش عارفة اوصفه بس هو ان الاتنين شخص واحد خاصة بعد ما قريت ردك ع التاج

التاج الاول

عجبتني الابيات اللي ذكرتهااوي
بس خد بقي الابيات المهمة ذات القيمة في حياة الانسان دي
حين يصبح الرجال رجل واحد
و تبصح الاشجار شجرة واحدة
و تصبح الانهار نهر واحد
و تصبح الفؤس فأس واحد
و ياتي الرجل الواحد
يمسك بالفاس الواحد
و يضرب بضربة واحد
الشجر الواحد
لتسقط في النهر الواحد
اكيد هاتحصل طرتطشة كبيرة اوي اوي اوي
هههههههههههههههههه

التاج التاني

اه فعلا موضوع المجاملة ده يشل و ياسلام بقي لما تدخل علي شعر ولا قصة مش مفهومة اصلا و تقعد تقرا فيها مش فاهمة حاجة خالص و تلاقي الناس مدية كلام اية الحلاوة دي دي عظيمة دي رائعة
و انا بص هو انا وداني طولت و طلعلي ديل ولا اية امال انا مش فاهمة لية متهايقلي بيكونوا بيجاملوا جامد
بس المشكلة الاكبر ان اللي بيجمله ده بيسوق فيها و بيبتلينا بابداعاته دي تاني !!!!!

نيجي للتاج ال3

جميل انك تكون لامس عيوبك و حاسس بيها بس الاجمل انك تحاول تغيرها
عشان حرام تحرج اللي قاعد جنبك في الاوتوبيس ;d
بس انت عارف انا ساعات برده مش برد خاصة لو راجل بقي و عايز يفتح حوار بخاف الدنيا يابني اتقل خيرها ههههههه

علي فكرة انا مش بحب اقرا بوست فيه كذا تاج بس بجد انا ماحسيتش خالص ان دول 3 تيجان كانوا لذاذ و اكدوا علي انطباعي عنك

ذاكر كويس

تحياتي

مش لاقية اسم يقول...

السلام عليكم
على فكرة اسم المدونة جامد اخر حاجة
كل سنة وانتة طيب
انا قريت والله بس عل\شا متزعلش بالعافية لان عنيا تعبانى جدا مش شايفة اساسا
ماشاء الله الصفات بتاع حضرتك جميلة بشكل
ارجوا زيارة مدونتى المتواضعة
السلام عليكم

كوارث يقول...

ممتاز يا ابو حميد
اجابات صادقة شايفها مفيهاش اي نوع من انواع التفزلك .. شكلك عايش في سلام نفسي جامد

إنتظارات شاهقة يقول...

ازيك
دكتور صغنون زى القمر
تصدق شكلك دكتور من زمان

يا فارس التاجات دى
انت تستاهلها بجد
حافظ عليها

وربنا يحقق لك امالك
وتبقى دكتور كبير
ونكشف عندك ببلاش
بس ابقى افتكرنى
احلام اليقظة
تحب اديك رقم البطاقة

*الطالبة عفو الله *زوزو يقول...

بقالي فترة ما قريت تاج
اهلا و سهلا بك يا فارس ادينا عرفنا حاجات عنك
انا معاك مية بالمية في حتة اكثر حاجة كرهتها في التدوين اه فعلا حاجة تخنق لما تحس الي رد باين عليه حتى مش قاري الموضوع
الله المستعان
بارك الله فيك يا فارس
دمت في حفظ الله
تقبل مروري

شهرزاد يقول...

السلام عليكم
مرسي لإجابتك وقبولك التاج
والظاهر ان تاجي كان هو الدافع وراء إجابتك لكل الواجبات المتراكمة

( ولكن أنا من النوع الذي حين يخاطبني شخص جواري بوسيلة المواصلات فأبتسم له دون رد ثم أدير وجهي تجاة النافذة حتي يحين موعد نزولي ...)
وهذه ايضا من صفاتي
الحمد لله مش لوحدي كده
ههههه

كل الشكر و التحية

canary يقول...

بصراحه ربنا مش بعرف اعلق على التاج

ولا حتى بعرف ارد عليه

وبما انك دايما تعليقاتك بتكون كويسه

ولها معنى فأنا مش هقدر اسيب تعليق

من نوعيه ايه العبقريه دى والصفات

الرائعه دى وانت طبعا مقدر

تحياتى لك

محمد فاروق الشاذلى يقول...

طبعا انت عارف إنى مش هاجاملك، أنا عجبتنى قوى الإجابات يامادى ياللى هاتاخد تمن الوردة (وش بيغمز) ومعاك جداً فى حكاية تعليقات المجاملة ورد الزيارة.
انت ضحكيت علينا علشان فوت السؤال بتاع (مين أكتر واحد بتهتم بتعليقه) كان نفسى أعرف بغض النظر اسمى فيهم ولا لأ.
وبعدين مين اللى فى الصورة ده؟ إنت لما كنت صغير؟ مين يقول إن البراءة دى هاتطلع دكتور فى الآخر يعنى هههههههههههه.
وعلى فكرة أنا كمان زيك فى حكاية الناس اللى بتكلمك فى الاتوبيس من غير ماتكون تعرفك ههههههههههه (رخمين احنا مش كده)
عايزين نتقابل بقى علشان نشوف حكاية ال 16 صفة دول.

إيه ده
أنا طولت قوى
طب سلام بقى

ابراهيم بكر يقول...

انا مش معاك كليا فى اكتر حاجة كرهتها هى الردود الغير واقعية وذلك
لان ممكن يكون مثلا واحد او واحدة كاتبين قصة تافهه من وجهة نظرك لانك تريد الجميع عقلانيين فاهميين مثقفين زى حضرتك ويا حبذا لو كانو فى كلية الطب نظرتك عنصرية يا استاذ

فيا اخى قد يكون الموضوع بتاعهم نابع فعلا من داخلهم ومشاكلهم وحالتهم النفسية فى ذلك الوقت ولذا فهم يستحقوا
الرد الجميل اكتر من المواضيع القوية وذلك لتشجعهم على التدوين والاستمرار فيه
ومن كثرة تنقلهم بين المدونات سوف تصلهم الا فكار بسهولة وبدون تجريح

ولعدم الاطالة
يا اخى لو سمحت متزعلش من كلامى ان كان به شدة
لانى قصدت ان اقوله لانى رأيت ان الردود
على البوست كلها لم تعارض تلك النقطة
بل واشادت باستهذائك منها
تحياتى hinger

فارس بلا جواد يقول...

أعتذر لجميع زوار المدونة .. انا كنت ناوي علي عدم الرد علي التعليقات الخاصة بالتاج بس لما وصلني تعليق الاخ hinger لاقيت نفسي مضطر للرد عليه
......
أخي العزيز
أولا اسمح لي أن أصف تعليقك بتلك النوعية التي يسمونها (دس السم في العسل) .. حاولت في تعليقك ان تتظاهر باللباقة في الكلام مع ان محتوي تعليقك يوجه لي اتهام بالعنصرية ولا اعرف اي عنصرية تقصد بل ربما لو تركت المجال لخيالك قليلا لصرت في نظرك مجرم حرب
انا املك الجرءة ان اعتذر اذا شعرت اني اخطئت في كلامي .. ولكني لازلت اصر علي كل كلمة قلتها .. وليس ذنبي انك لم تحسن فهم معناه
سأرد عليك من كلماتك انت
(ولذا فهم يستحقوا
الرد الجميل اكتر من المواضيع القوية وذلك لتشجعهم على التدوين والاستمرار فيه)
ان كنت تركت مساحة بسيطة لنفسك للتفكير في معني كلامي فكنت ستدرك ان هناك فرق بين ان نشجع شخص وبين ان نخدعه .. ولو كنت تقرأ تعليقاتي في المدونات الاخري فستعرف جيدا انني من أكثر الناس الذين يهتمون بان تكون تعليقاتهم مشجعة دوما ولم يحتوي اي تعليق لي في يوم من الايام علي اي ملمح للسخرية أو الاستهزاء واتحداك ان وجدت هذا في اي مدونة .. لان هذا ليس من اخلاقي اولا وليس من حقي ثانيا ان اقيم اذا كان هذا جيد وهذا ردئ
انا كنت واضح وصريح في كلامي باني اكره المبالغة في المدح التي تصل احيانا لدرجة منفرة ومستفزة خصوصا عندما يكون الموضوع عادي وربما احيانا اقل من العادي .. وانا هنا اتحدث من الناحية الفنية ولا علاقي لي ان كان الكلام عن تجربة شخصية أم لا
اذا كنت تري ان هذا المدح المزيف هو شيئ حميد فهذة وجهة نظرك الخاصة ولست مجبر علي الاقتناع بها .. لانني اري ان هذا خداع وجريمة نرتكبها في حق هذا الشخص .. ولاحظ في كلامي انني لم اهاجم اصحاب المواضيع المنشورة انفسهم لانهم من حقهم التعبير عما بداخلهم باي طريقة ولا يلزم ان يكونوا شعراء ومبدعين كما في ادعاءك الباطل الذي اتهمتني فيه بسخرية بانني اريد كل الناس عقلانين ومثقفين زي حضرتي .. ولكني هاجمت بعض المعلقين فقط الذين يسيئون لفكرة التعليق عموما ويجعلونها تفقد مصداقيتها
........
(لانى رأيت ان الردود
على البوست كلها لم تعارض تلك النقطة)
وهذا سبب أدعي أن تراجع نفسك .. لأن زوار مدونتي كلهم اعتز بهم وبطريقة تفكيرهم ولو كنت شعرت ان كلامي قد سبب ضيق لاحد منهم كنت لحظتها سأراجع أنا نفسي .. ولكني أعتقد أنهم قد انعم الله عليهم بنعمة العقل والتفكير والتروي
بصراحة انا حزين من تعليقك ليس لان به نوع من الهجوم ولكن ربما حزين علي طريقتك في التفكير وللاسف هي طريقة توجد لدي الكثير من الشباب هذة الايام الذين يتوقفون عند نصف الاية (يا أيها اللذين أمنوا لا تقربوا الصلاة) ولا يكملوها لكي يعرفوا معناها .. لقد صرنا نخترع بؤر للاختلاف من لاشئ حتي نمارس بها دور بطولي
أخيرا عندما تنقد موضوع يجب ان تكون ملم بكل جوانبه وتعرف المقصد من الكلام جيدا ولا يكون مجرد نقد أهوج .. لانه احيانا يكون الصمت افضل من الكلام خصوصا عندما يكون الكلام من نوعية ( أنا أنتقد إذن أنا موجود )
.....
اعتذر انا ايضا ان كان كلامي به شدة ولكنها علي الاقل شدة مبررة
هذا وبالله التوفيق

شهد الكلمات يقول...

يا استاذ هينجر

لو كنت فظاً غليظ القلب لنفضوا من حولك

لو حضرتك دي وجهة نظرك انت حر فيها لكن ممكن تقولها بطريقة احسن من كدة لا تهين صاحب المدونة و لا زوار المدونة

ثم حضرتك جديد علي مدونة فارس بلا جواد يعني اول زيارة و طالما ماكنش عجبك كنت ممكن ما تسيبش تعليق و خلصنا خاصة انه لا ذكر حضرتك بالاسم ولا اي حد تاني

ثم فعلا في ناس بتنافق لمجرد ان الناس تدخل مدونتها و خلاص و في ناس نقدها هدام و بتحب تسيب كلام و خلاص علي اساس انا احسن من الكل و الباقي متخلف .

ثم ماعتقدش ان دخول كلية الطب بقي جريمة الواحد يتحاسب عليها و تكون مسار سخرية
و لا هواش السعي و راء الكمال و الثقافة في مجتمع انعدمت فيه الثقافة و الذوق و الاخلاق جريمة

ثم لو دكتور احمد مدونته مش اد كدة ماكنتش نسبة التعليق علي موضوعاته توصل ل100 تعليق
اظن ده دليل انه انسان قلمه كويس جدا جدا و ماهواش عنصري عشان ماحدش يدخل له

اسفة للتطويل
تحياتي

غروب يقول...

بخخخخخخ انا جيت تانى

بصراحه مقدرتش امنع نفسي من انى ارد على شويه كلام مطروح

طبعا فارس مش شخصيه هينه ولا عنصري ولا الكلام اللى اتقال ده خاااالص

لكن برضه الراجل التانى مغلطتش اوى

هو يمكن مقدرش يهذب الفاظه بس

عايزه اقول للشخص الاخر:
ان فارس فعلالالا من الشخصيات اللى دايما بتنقد بجد نقد له قيمه ...يعنى مش لازم يقول للواحد انت فظييييييييع انت محصلتش وهو كاتب شويه كلام فارغ

الاستاذ التانى بيقول لازم نحترم التانى حتى لو كلامه تافه

معاك ...بس المدونات اتعملت لحد بيعرف يكتب او انه عايز يخرج اللى جواه

اللى جواه ده بقه مربط الفرس...

يعنى شايف نفسه بيعرف يكتب فصحى كان بها ...لاقي نفسه في العاميه كان بها

لكن ميجيش بقه يقلب الايه

يبقي كويس في توصيل احساسه بالعاميه ويلبخ بالفصحى ولا العكس

اظن وجهه النظر واضحه

وده كان قصد فارس اعتقد

عموما حصل خير والجميع هنا اخوه

والسلام عليكم ورحمه الله وبركاته

وعايزه تصفيق حااااار جدااااااااا بعد الكلام الكبير ده

ابراهيم بكر يقول...

يا جاماعة مفيش مشكلة مع فارس ولا حاجة ولكن انا كتبت تعليقين هو نشر واحد منهم وترك التانى
وبعدين والله انا كنت عاوز نوصل فكرة مع بعض الشدة فى الكلام لبيان تحيل الشخصية التى امامى وهل هى مطابقة لما تفضل الدكتور فارس وقال عن نفسه ولا لا
فوجتها مطابقة فى حاجات كتيرة وغير مطابقة فى اخرى
وبعدين عاوزين التعليقات تسخن كده متبقاش كلها مجاملات!!
اخى فى الله والله انا لا احب اى خصومة بينى وبين اى انسان
وهذا ليس للرد ولكن للتوضيح

انت مش عاوز مجاملات صح!
لو انك نزلت ضيف عندى وقلت لى مثل ما قولت لاختلف الوضع لانك فى بيتى مينفعش اساسا ارد عليك باى اسلوب لاتقبله

ويا ريت تنشر هذا التعليق

نعكشة يقول...

يا كوكي ( تعليق علي الصورة)
ماشاء الله
عسولة بجد
ماشاء الله عشان الحسد برضو

..........


حلوة الابيات بتاعة الشافعي الله يرحمه

مش عارفة لما بشوف حكاية الغش دية بنكمش كدة و بزمزأ معرفش يعني اية بزمزأ دية بس عجبتني عامتاً مبحبوش خالص صراحة
بس الصراحة حلوة برضو

ياما واحنا صغيريين قعدنا نحط احلام انا و صحابي و هوبا كل واحد راح في دوامة الحياة

حكاية عدم التأقلم دية بتفكرني بوالدتي بجد اول ما تقعد ف يالمحطة تبدأ ترغي مع الست اللي جمبها لدرجة انك تحس انهم صحاب
هههههههههه


يلا خير

ربنا يوفقك يا رب

سلام عليك

فارس بلا جواد يقول...

أولا أشكر شهد الكلمات وساسو علي الاهتمام والمشاركة في هذا النقاش .. وسعيد جدا برأيكما
......
أخي العزيز hinger .... لمحت في لهجتك بعض التغيير وهذا شيئ يسعدني .. وسأقوم بالرد علي تعليقك بالتفصيل
.....
(ولكن انا كتبت تعليقين هو نشر واحد منهم وترك التانى)
كلامك يوحي بأنني أحاول إظهار بعض الحقيقة واخفاء بعضها أو أقوم بالمصادرة علي رأيك
لا أدري لماذا أنت مصر أن تغالط نفسك .. انت تعرف جيدا أن تعليقك الثاني هو نفسه التعليق الأول لم تنقص ولم تزد عليه أي شيئ .. وكل ما في الأمر أنني أعتقدت أنك عندما لم تري تعليقك الأول نظرا لأنني أضع إشراف علي التعليقات فقمت باعادة إرساله مرة أخري بنفس الصيغة مع اختلاف بعض كلمات بسيطة و لم تضف أي معني جديد لذلك نشرت واحد منهما فقط .. فلِم تتعمد هذة الإدعاءات الباطلة ؟
لو كان تعليقك التاني مازال لدي لكنت نشرته في الحال بعد كلامك هذا لكي يتأكد زوار المدونة من صدق كلامي ولكن للاسف مسحته .. عموما إذا كنت تري ان تعليقك الثاني كان به شيئ جديد عن الأول فارسله مرة اخري وأنا علي استعداد لنشره أمام الجميع
......
(وبعدين عاوزين التعليقات تسخن كده متبقاش كلها مجاملات)
سبحان الله بالأمس كنت تدافع عن المجاملات وتري أنها ضرورية لتشجيع المدونين .. واليوم ترفضها
ربما يا أخي لو كنت أعلنت رفضك للمجاملة من البداية لما كان هناك خلاف من البداية ووفرت علينا هذا الصداع
...........
(لو انك نزلت ضيف عندى وقلت لى مثل ما قولت لاختلف الوضع لانك فى بيتى مينفعش اساسا ارد عليك باى اسلوب لاتقبله)
وهل من حقك أن تهين الناس بمدوناتهم أما في مدونتك تحترمهم ؟ ... عندما تقول لشخص أنه عنصري فوقع الكلمة عليه لن يختلف ان كان في مدونته أو مدونتك أو في المريخ .. وأعتقد أن عكس كلامك هو الصحيح فالأنسان عندما يدخل مدونات الغير أو بيوتهم علي حد تعبيرك يجب أن يحترم أصحابها .. والأهم من ذلك أعتقد انني قمت بالرد عليك بأسلوب مقبول حتي وإن كان به حدة إلا أنني حافظت علي أداب الحوار ولم أوجه لك إهانة مثل التي وجهتها
.......
(ويا ريت تنشر هذا التعليق)
بكل تأكيد فأنا لا أصادر علي أي رأي .. ولا أمنع نشر أي تعليق طالما لم يتجاوز حدود الأدب .. وطالما لدي عقل ولسان فأنا مستعد للرد علي أي تعليق يصلني من أي شخص

Unknown يقول...

طب نضحك ليه دى الصورة حلوة قوى والله والولد اللى فيها مش شبهك خالص (وش رخم) وشعره سايح كدة وعسول......ما علينا المهم انت نسيت تقول انك ضليع فى اللغة العربية وانك مثقف جدا... هو صحيح انت اتعلمت عربى كدة فين؟؟؟ اه والله مش هزار انا اصلى فى اللغة عبقرية ونفسى بجد ادرس نحو عشان الفضايح وكدة... المهم اجاباتك حلوة جدا ودمها خفيف ... بس اوحش حاجة انى مخدتش جرعة الشعر بتاعة كل مرة..ما تتاخرش بقى عشان اعراض الانسحاب

غير معرف يقول...

عزيزي فارس

علي فكره الصوره توتي خالص و انت صغير و فيها شبه كبير منك
:)))

كل سنه و انت طيب و الف مبروك علي التيجان
دايما بقول ان التاج وسيله حلوه عشان نتعرف بيها علي اللي بيجاوب علي الأسئله و طبعا الاسئله اتاحت لينا فرصه جميله اننا نتعرف اكتر علي شخصيتك
طيب معطاء و صريح
تحياتي ليك و بالتوفيق دايما

ابراهيم بكر يقول...

بس الله
اخى فارس ان شاء الله تكون الرسالة وصلت
فانا مستمتع بهذا النقاش ولكن علمونا مدربى التنمية البشرية انه فى حالة شخصية
مثل حضرتك يكون من الافضل مداومة النقاش
لانه سيكون جدال.
ولاننا لا نقيس اى نقاش بانه فرض رأى على الاخر او فوز او تضيق على رأى الاخر
ولكنى عجبت لامرك فعلا فانا ممكن نبعتلك تحليل الشخصية على الايميل افضل
وانا واثق ان شاء الله انك فى المرة القادمة هيكون اسلوبك مع الاخر فى نقد مواضيعهم وتعليقاتهم اتغير
تحياتى

Mafrousa يقول...

كل سنة و انت طيب
يااا بقالنا كتير مش جيت
معلش
بس قبل اي حاجه
صورة الطفل جميل اوي
تحياتي

ريمان يقول...

ههههههههههه

السلام عليكم

انا اما لقيتك بتقول 11 تاج انا كنت همشى

ههههههههه

بس اجاباتن جميله وصادقه وعرفتنا بيك اكتر وعرفنا عنك حاجات كتير

ربنا يعينك يا رب
ويحقق لك كل احلامك

مع تحياتى

ريمان

doaa يقول...

أنا أول مرة أزور مدونتك
وإن شاء الله مش هتكون الأخيرة عشان بجد أشعارك جميلة جداً وفيها صدق وده مش مجاملة زي المجاملات اللى بتغيظك
وصورتك عسول جداً
تقبل مروري