CLICK HERE FOR BLOGGER TEMPLATES AND MYSPACE LAYOUTS »

2008-06-03

لما كتر الغنا ع الفاكهة .. قلت أغني أنا للخضار


مع الاعتذار للفنان أحمد آدم عن اقتباس أسم الأغنية

الموضوع اللي عايز اتكلم فيه انهارده عايز شوية خيال .. يعني ممكن تتخيلو معايا ان احنا شبة الخضار .. ايوة الخضار اللي بناكله ده برده ليه صفات زينا وممكن نكون احنا شبهه في حاجات كتير.... حاولت أكتب شعر اقول فيه الكلام ده يا رب يعجبكو ومستني التعليقات

...............

الحياة فيها ناس كتار

يشبهوا كل أنواع الخضار

ناس بتشبه الليمون

حياتهم تعيسة ومُرة

وناس كمان زي القرع

لما بيمدّو لبرة

وناس غلابة

قادرة ع الأحزان تعدّي

قلبهم من جوه أخضر

زي عود جرجير مندّي

ناس كمان شبه الكرنب

لما تأكله ينفخ البطن قوام

هما برده بطنهم

منفوخة من أكل الحرام

ناس وناس وناس

مهما تختلف الأسامي

ناس زي قرن الفلفل

طبعهم حراق وحامي

ناس بتضحك ناس حزينة

ناس بتغرق في السكون

ناس كمان زي الطماطم

عشقهم هو الجنون

أما بالنسبة للكوسة يا سادة

فدي في بلدنا من زمان

وواخدين فيها الريادة

المهم الناس كتار

وحياتها مليانه آلام

للأسف خلص الخضار

بس ما خلصش الكلام

.....

19 التعليقات:

رحاله يقول...

بسم الله
السلام عليكم
اخى عندك حق
تقبل منى هذه الخاطرة




ناس كتير
ناس كتير جواها ارادة بس تايهين وسط الغابه

وناس كتير بتأثر فينا وناس كتير اتخلقو بس علشان يمسحو دموع عنينا

ناس كتيرعندها ايمان بان نرجع زى زمان

ناس كتير خدعونا وناس كتير ضحكو علينا وناس كتير كانو سند لينا

ناس كتيراتخلقو علشان يضحكونا وناس كتيراوى بتنكد علينا

ناس كتير بنتمنى نقرب منهم ونلمس ايديهم بس الظروف بتقسى علينا

ناس كتيربنديهم قلوبنا بس هما فى الميه بيرموها

ناس كتير بتتمنى تفدينا بروحها بس بيضيعو من بين ايدينا

ناس كتير حبيناهم بس محسوش بينا وناس كتيرجواهم احساس بس مش قادر يوصل الينا

ناس كتير بتدينا الحنان وناس بالرعب دايما ترمينا

ناس كتير ببعدهم عنا بنحس بالضياع وناس كتيرقربهم منا بيكون ابتلاء

ناس كتير كان نفسنا نملك قلوبهم بس هما فى الاصل مش بيكونو لينا

دول ناس كتير
كتبتها جيلان صالح
تحياتى

كاميليا يقول...

السلام عليكم

حلو قوى التشبيه ومنطقى جدا

كنت عاوزه اكتب عن ناس زى الزهور

بس قولت خليها زيارة وتعرف على مدونتك
المرة دى


تحياتى وتقديرى

Tamer Nabil يقول...

كلمات جميلة

وبجد فى ناس كتير فى منها من الفاكهة والخضار


ربنا يكرمك

تحياتى

فارس بلا جواد يقول...

رحالة

أشكرك علي هذة الخاطرة .. كلامك حلو وجمع حاجات كتيرة متناقضة وعكس بعض
عجبني البيت (ناس كتير كان نفسنا نملك قلوبهم بس هما فى الاصل مش بيكونو لينا)
اتمني انك تشرفيني دايما

..........................


كاميليا

أشكرك علي التعليق ويارب تكون المدونة كلها عجبتك
فكرة حلوة انك تكتبي عن ناس زي الزهور بس انا اخترت الخضار لاني تقريبا كنت جعان ساعتها
هههههههههههههههه
يارب ما تكنش اخر زيارة

.............................

تامر نبيل

أشكرك علي تعليقك .. فعلا كنت مستنيه من زمان .. واشكرك انك لفت انتباهي ان كان في مشكلة عندي في التعليقات لكن الحمد لله حليتها .. واتمني دايما تشرفني واسمع رايك

الشنكوتي الكبير يقول...

اول تعارفنا اشعارك يا جميل
بجد بجد لذيذه قوي
ومغذيه طبعا

يا اخي تصدق انا كنت بتغاظ قوي من كام مدون دكااتره وصيادله من غير زعل يعني بس انت طلعت عسل خالص
يا خوفي لتطلع دكتور نص نص
ما هو يا تبقى فزيع هنا كده يا اما فزيع هنا
لو عرفت انك ممتاز في الأتنين ليك عندي هديه حلوه انشاء الله
هاجي اكشف عندك وانفعك يا سيدي
ربنا يسعد ايامك
سعيد جدا بزيارتك وتشريفك ومعرفتي بيك

سلاااااااااااااااااام
اخوك ايهاب

كوارث يقول...

دنتا طلعت مشكلة
هههههههههههههههههه
جامدة قوي القصيدة والله يا باشا
واداءك فيها موفق جدًا
فعلا يعني ماليش اي تعليق عليها
هيا اكتر من رائعة !
بعد قرايتي للقصيدة ده جالي اعتقاد خاص اني شبه البطيخه !
ولا الفاكهة لسه ما دخلتش اللعبة ؟

فارس بلا جواد يقول...

الشنكوتي الكبير

ههههههههههههه
انا بردة باتخنق من التدوين بتاع الدكاترة والصيادلة .. بس معلش لازم نستحملهم ونسيبهم يفضفضوا شوية كفاية اللي بيشوفوه في دراستهم .. هنبقي احنا والزمن عليهم .. بس باطمنك انا برده الي حد ما زمايلي بيقولو عليا دكتور شاطر .. يعني تنور العيادة في اي وقت بس لما افتحها الاول
اتمني تزور مدونتي وبلاش العيادة .. وربنا يديم عليك الصحة وماتروحش لاي دكتور ـ ولو ان ده هيوقف حالنا ـ بس بردة صحتك بالدنيا

فارس بلا جواد يقول...

كوارث

شكرا علي تشجيعك .. والله انت اللي باشا .. يا ريت دايما تنورني وتقولي رأيك
بالنسبة للبطيخ جربت احطه بس لاقيت الوزن هيبقي مكسور .. الظاهر عشان البطيخ تقيل شوية

شهد الكلمات يقول...

بدات اقرا القصيد باهتمام و شوية شوية لاقيت شافيفي عمالة تبتسم تبتسم لحد ما وصلت لودني

انا استمخيت من الكلام بجد
حلو جدا و جميل بسيط و سهل ممتنع

شكلك كدة دكتور تغذية ولا اية هههههه

تقبل مروري ان شاء الله مش هاتكون اخر زيارة في عيادتك يا دكتور

و بما انك غاوي شعر احب اعزمك عندي في مدونتي و يا رب تعجبك

تحياتي

شهد الكلمات يقول...

اه نسيت اسمحلي اضيف الرابط بتاعك عندي في المدونة :)

اجندا حمرا يقول...

عزيزي فارس بلاجواد

تشبيهاتك في الصميم عزيزي
الدنيا دي فيها نوعيات كتيره من البشر و حتما و لابد اننا يمر بينا نوعيات منهم سواء في حياتنا العمليه او في دايره الأصدقاء
اهم حاجه اننا نعرف نتعامل مع كل نوع

تحياتي علي اسلوبك المميز في عرض الفكره

فارس بلا جواد يقول...

شهد الكلمات
ميرسي جدا علي الكلام الحلو ده .. بجد انتي نورتيني .. ويا رب دايما تزوري مدونتي .. وشرف ليا اني ازور مدونتك اكيد .. ويا ريت تسمحيلي انا كمان اضيف الرابط بتاعك عندي

فارس بلا جواد يقول...

اجندا حمرا
كلامك صحيح ان الدنيا فيها نوعيات كتيرة في البشر .. عشان كده في النهاية وصلت لحقيقة ان مهما نشبه الناس بانواع من الخضار فالخضار هيخلص لكن نوعيات البشر عمرها ما هتخلص .. وكل مدي هيمر علينا في حياتنا نوعيات جديدة عمرنا ما شفناها قبل كده
ميرسي جدا علي ذوقك

شهد الكلمات يقول...

ده شئ يشرفني جدا انك تضفني عندك و عموما انا سبقتك و ضفتك عندي

تحياتي

بنت مصريه يقول...

جميله جدا يا فارس
ربنا يوفقك يا رب
ويزودلك موهبتك كده وتبقى زى
الجرجير كده وراور يعنى

سفينة يقول...

هههههههههههههههههه

اسمحلي اقول لك انت فنان

والله العظيم فنان

ومبدع كمان
................

أنا مش عارف اشكرك ازاي علي تعريفي بيك وبمدونتك الرائعه دي

تقبل مروري ومستنيك تنورني دايما


خالص تحياتي

قبطان

فارس بلا جواد يقول...

بنت مصرية

هههههههههههه
ميرسي جدا علي تعليقك .. يا ريت أكون زي الجرجير أهو برده بيدي طعم للسلطة .. مستنيكي دايما تنوريني

........................

سفينة

انا اللي باشكرك يا قبطان انك نورتني انهاردة .. ويا ريت دايما وانت ماشي بسفينتك في بحر المدونات تبقي تعدي عليا
وميرسي جدا علي الكلام الحلو اللي يشجع
ودايما مستني أعمالك الجديدة

رؤية يقول...

هههه
فكرة غريبة...
لكن طريفة...
وبصراحة...
مظلومة معانا الفاكهة والخضار!

غير معرف يقول...

باختصار وبدون زعل
اكتب فصحي , مستقبلك فيها
واترك العامية لمن يتقنونها
تمسك بلغتنا الجميلة فكلماتك بها ارقي وان كانت أفكارك في الاثنين متجددة وتحمل معاني قيمة